猴年初一至初三去边好？9大贺年活动逐个睇！

放假啦，放假啦！新假期祝大家新年快乐，身体健康！最紧要当然有只足金金猴贺新春。但係初一至初三个个都放晒假，除了拜年仲有咩好做？精选了9款活动畀大家，希望大家新一年发过马骝头。放心放心，以下介绍的活动有室内、室外咩都有，包保大家有着落！

一：HelloKitty、布甸狗同你贺年！年初一花车巡游

大年初一点少得花车巡游！新一年第一日当然要喜兴洋洋，成大班人凑下热闹，咁先有新年气氛嘛。今年花车巡游主题为「环球乐园．新春派对」，意味集合五湖四海嘅表演队伍，总共13辆花车，当中有香港迪士尼乐园花车，到时大家一齐唱Happily Ever After～谂起有年Sam哥係花车上（同我）say hi，心都软埋。如果唔想错过车上每个靓仔靓女，可以带定望远镜逐个睇。不过到时咁多人，边行边睇边盯，都係睇路好啲。

花车会沿住广东道、海防道、弥敦道及梳士巴利道前行，最后以香港喜来登酒店外作终点。虽然观众席嘅票经已售罊，但大家可以免费係巡游路线两边欣赏。或者唔想同人逼，可以睇电视直播！

新春国际汇演之夜 2016

日期：年初一，2月8日

时间：8pm-9:45pm （无綫电视翡翠台现场直播）

巡游路线：广东道、海防道、弥敦道及梳士巴利道前行，香港喜来登酒店外为终点。

二：年初二猴年贺岁杯

如果初二就唔驶拜年嘅朋友，可以考虑到旺角大球场撑下贺岁杯，依加都仲有少量票可以买。当日总共有3场波，戏肉係下午4点开波嘅「香港代表队」 对「香港联赛选手队」，领队分别係莫耀强先生、詹培忠先生及贝钧奇先生、梁芷珊女士，全场90分钟。头2场就有「香港女足80」对「香港女足90」、「香港经典选手队」对「经典外援选手队」，一齐支持本地足球吧！

《猴年贺岁杯》

日期：年初二，2月9日

时间：（第一场）1:30pm 全场40分钟；（第二场）2:30pm 全场40分钟；（第三场）4pm 全场90分钟

地址：旺角大球场

购票：城市售票网 （即日至2月7日晚上11时59分）

票价：正价票$100；学生及长者$30

三：年初二烟花汇演

睇完贺岁杯，直落维港睇烟花！不过想睇到成个景，都係要早啲霸位，再唔係等电视直播都唔错。猴年当然唔少得马骝头，大会表示到时第二幕会爆出马骝笑脸㗎！大家记得準备好相机，捕获野生马骝。但最最最最紧要係天气好风向佳，唔係大家又睇晒23分钟，八幕表演都搵唔到马骝头。

农曆新年烟花汇演

日期：年初二，2月9日

时间：8pm（无綫电视翡翠台现场直播）

地点：中环及尖沙咀之间的维多利亚港海面

四：年初三赛马日

虽然大年初三係红假，但马要照跑。到时唔单止有马睇，连狮子都有得你睇。狮子呀，舞狮个只「狮」‥‥‥而且骑师风水师都会同大家拜年，今次仲唔鸿运当头？

赛马日

日期﹕ 年初三，2月10日

时间﹕ 12pm-6pm

地点﹕ 沙田马场

票价﹕ 公众席＄10；游客入场证章＄130 （须出示有效旅游证明文件）

购票﹕ 沙田马场及指定场外投注处

五：紫色牛牛《神龙魔法师》

新年想沾啲洋气？可以去位于中环嘅紫色牛牛剧场，睇下来自拉斯维加斯嘅魔法师表演。佢叫神龙魔法师，原来係《全美一叮》嘅选手，当年令到班主持笑到停唔到！如果想今年高高兴兴开个年，佢一定可以满足你嘅愿望。佢初一至初三无休，只係得返少量平飞，愈迟就愈贵喔。

《神龙魔法师》

日期﹕ 年初一至三，2月8日至2月10日

时间﹕ 9pm-10pm

地点﹕ 香港中环龙和道9号

票价﹕ $523 / $435 / $385

购票﹕ 快达票

六：林村许愿节

大家亦可以去林村许个愿，希望好运临到自己及身边人。适逢林村举行2016许愿节，初一至初三都有嘢畀大家睇！初一早上11点就有署理行政长官点灯，初二下午2点至4点，同初三下午2点半至4点就有国际花车表演队伍表演。而且初一巡游13辆花车，翌日已经係林村展出，如果想近距离同花车影相，好把握时机啦，摆到2月22日咋！

2016许愿节

日期：2月8日至2月22日

时间：9am-7pm

地点：林村许愿广场

费用：免费

网站

七：幻彩咏香江升级版

年初三喺尖沙咀睇完烟花，年初三去尖沙咀都有嘢睇。就喺文化中心露天广场，钟楼隔离，共4个时段播出影片，每节约8分钟，分别喺晚上8:20、8:45、9:15 及9:45。大家经过尖沙咀，望住海旁挚爱之余，都可以抬头望下露天广场。事关一够钟就会有影像投射喺文化中心及钟楼，同幻彩fing乾乾係两个层次呢。

「闪跃维港」3D光雕汇演

日期︰2月10至29日

时间︰晚上8:20、8:45、9:15 、9:45（每节约8分钟）

地址︰九龙尖沙咀梳士巴利道10号香港文化中心露天广场

费用：免费

八：呃like！中式Alice in the Wonderland

行入呢堆瓷具，就觉得自己好似爱丽丝咁缩细咗。趁住新年着新衫扮靓靓，就记得影多啲相。不过影相之余亦唔好错过商场啲换领品！话晒新年畀钱都畀得疏爽啲，一个唔觉意都可能签够千五蚊。只要用电子货币买满千五蚊，就可换领「美心西饼鬆脆三重奏礼盒」，唔好蚀畀商场呀。

「瓷」名中西乐茶园

日期：即日起至

地点：马鞍山新港城中心L2天幕广场 （港铁马鞍山站）

九：陪长辈睇跳花影舞

老一辈嘅朋友，相信都会较为喜爱艺术感较高、相对较为文静嘅活动，喺北区嘅朋友可以睇下上水广场嘅「花影‧舞动艺裳展」，日本踊绘艺术大师神田沙织举行香港首个个人展览，设计出全港首个以「春花」为主题的5米高巨型和服造型装置艺术品，图案洋溢富贵丰盛的樱花。此外，展览超过15件糅合视觉及肢体创意艺术、艳丽多彩及巧手细腻之艺术珍品，包括多幅别具个人风格色调之绘画作品，分别为「弁财天」、「咲咲乐」、「翔翔梦」、「嬉嬉乐」、「春待」、「夏待」等画作、别緻的和服及日式展品，

Landmark North上水广场 x 神田沙织「花影‧舞动艺裳展」

日期：1月24日至2月29日，上午10时至下午10时

地点：上水广场2楼中庭

其实有节目又好，冇节目又好，新一年都係想开开心心，一团和气。见到初一至初三都仲开工嘅朋友，就讲句新年快乐，辛苦晒吧。人人放假自己冇得放假好惨㗎‥‥‥虽然佢哋可能係double paid。